ಆರಗ ಗುತ್ತಿ ರೇಣುಕಾಂಬಾ ದೇವಾಲಯದಲ್ಲಿ ನೂತನ ಧ್ವಜಸ್ತಂಭ ಲೋಕಾರ್ಪಣೆ
ತೀರ್ಥಹಳ್ಳಿ: ಆರಗ (ಶಿವಮೊಗ್ಗ): “ಆತ್ಮವೇ ದೇವರು. ಯಾವುದೇ ಮನುಷ್ಯ ತನ್ನ ಆತ್ಮಶಕ್ತಿಗೆ ವಿರುದ್ಧವಾಗಿ ಬದುಕಲು ಸಾಧ್ಯವಿಲ್ಲ. ನಮ್ಮೊಳಗಿನ ಚೇತನಶಕ್ತಿ ಸತ್ಯವನ್ನು ಸದಾ ಎಚ್ಚರದಲ್ಲಿಡುತ್ತದೆ. ಅದನ್ನೇ ದೇವರೆಂದು ಭಾವಿಸಿದರೆ ಬದುಕಿನಲ್ಲಿ ಕೆಟ್ಟದ್ದಕ್ಕೆ ಅವಕಾಶವಿರುವುದಿಲ್ಲ,” ಎಂದು ಆದಿಚುಂಚನಗಿರಿ ಮಹಾಸಂಸ್ಥಾನದ ಪ್ರಧಾನ ಕಾರ್ಯದರ್ಶಿ ಶ್ರೀ ಶ್ರೀ ಪ್ರಸನ್ನನಾಥ ಸ್ವಾಮೀಜಿ ನುಡಿದರು.
ತೀರ್ಥಹಳ್ಳಿ ತಾಲ್ಲೂಕಿನ ಆರಗ ಭಾಗದ ಸೀಮೆ ದೇವತೆ ಶ್ರೀ ಗುತ್ತಿರೇಣುಕಾಂಬಾ ದೇವಾಲಯದಲ್ಲಿ ಬುಧವಾರ ನಡೆದ ನೂತನ ಧ್ವಜಸ್ತಂಭ ಉದ್ಘಾಟನಾ ಸಮಾರಂಭದಲ್ಲಿ ಅವರು ಆಶೀರ್ವಚನ ನೀಡಿದರು.
ಶಾಂತಿ ಮಂತ್ರ: ನಿಟ್ಟೂರು ನಾರಾಯಣಗುರು ಮಹಾಸಂಸ್ಥಾನ ಮಠದ ಪೀಠಾಧ್ಯಕ್ಷ ಶ್ರೀ ಶ್ರೀ ರೇಣುಕಾನಂದ ಸ್ವಾಮೀಜಿ ಮಾತನಾಡಿ, “ಶಾಂತಿ ಮತ್ತು ನೆಮ್ಮದಿ ಕೇವಲ ಗುರುಸ್ಥಾನ ಹಾಗೂ ದೇವಸ್ಥಾನಗಳಲ್ಲಿ ಮಾತ್ರ ಲಭ್ಯ. ದುರ್ಗುಣಗಳನ್ನು ತೊರೆದು ಸದ್ಗುಣಗಳನ್ನು ಅಳವಡಿಸಿಕೊಳ್ಳಬೇಕು,” ಎಂದರು.
ಜಾತ್ಯತೀತ ಮೌಲ್ಯ: ಮಾಜಿ ಸಚಿವ ಕಿಮ್ಮನೆ ರತ್ನಾಕರ ಮಾತನಾಡಿ, “ಯಾವ ದೇವರಿಗೂ ಜಾತಿ-ಧರ್ಮವಿಲ್ಲ. ಅಹಿಂಸಾತ್ಮಕ ಬದುಕು, ಪ್ರೀತಿ ಮತ್ತು ನಂಬಿಕೆಗಳೇ ಶಾಶ್ವತವಾದ ದೇವರು. ಪ್ರಕೃತಿಯಿಂದ ಉದಯಿಸಿದ ವೇದ-ಉಪನಿಷತ್ತುಗಳ ಸಾರವನ್ನು ನಾವು ಉಳಿಸಿಕೊಳ್ಳಬೇಕು,” ಎಂದು ಕರೆ ನೀಡಿದರು.
ಸಾಂಸ್ಕೃತಿಕ ಹೆಮ್ಮೆ: ಎಂಎಡಿಬಿ ಅಧ್ಯಕ್ಷ ಆರ್.ಎಂ. ಮಂಜುನಾಥ ಗೌಡ ಮಾತನಾಡಿ, ಮಲೆನಾಡಿನ ಸಂಸ್ಕೃತಿಯಲ್ಲಿ ವಿವಿಧ ಧರ್ಮಗಳ ಪ್ರಭಾವವಿದ್ದರೂ, ಗುತ್ತಿರೇಣುಕಾಂಬಾ ದೇವಾಲಯದ ಬಗ್ಗೆ ಒಕ್ಕಲಿಗ ಸಮುದಾಯಕ್ಕಿರುವ ಭಕ್ತಿ ಅನನ್ಯವಾದುದು ಎಂದು ಸ್ಮರಿಸಿದರು.
ಐತಿಹಾಸಿಕ ಹಿನ್ನೆಲೆ: ಸ್ವಾಗತ ಭಾಷಣ ಮಾಡಿದ ಚಂದುವಳ್ಳಿ ಸೋಮಶೇಖರ್, “ಪುರಂದರದಾಸರ ಜನ್ಮಸ್ಥಳವೆನ್ನಲಾದ ಆರಗ ಪ್ರಾಂತ್ಯವು ಪುರಾಣ ಮತ್ತು ಇತಿಹಾಸದ ದೃಷ್ಟಿಯಿಂದ ಅತ್ಯಂತ ಮಹತ್ವ ಪಡೆದಿದೆ,” ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಶಿವಮೊಗ್ಗ ಆದಿಚುಂಚನಗಿರಿ ಶಾಖಾ ಮಠದ ಶ್ರೀ ಶ್ರೀ ನಾದಮಯಾನಂದನಾಥ ಸ್ವಾಮೀಜಿ, ರಾಜ್ಯ ಒಕ್ಕಲಿಗರ ಸಂಘದ ನಿರ್ದೇಶಕ ಧರ್ಮೇಶ್ ಸಿರಿಬೈಲು, ಗುತ್ತಿ ರೇಣುಕಾಂಬಾ ಸೇವಾ ಸಮಿತಿ ಗೌರವಾಧ್ಯಕ್ಷ ಸುರೇಂದ್ರ ಗೌಡ, ಖಜಾಂಚಿ ಧನಂಜಯ ಡಿ ಹಾಗೂ ಇತರ ಪ್ರಮುಖರು ಉಪಸ್ಥಿತರಿದ್ದರು.
ಸಾವಿರಾರು ಭಕ್ತಾಧಿಗಳ ಸಮ್ಮುಖದಲ್ಲಿ ಧ್ವಜಸ್ತಂಭಕ್ಕೆ ವಿಶೇಷ ಪೂಜೆ ಹಾಗೂ ಲೋಕಾರ್ಪಣೆ ವಿಧಿವಿಧಾನಗಳು ಅತ್ಯಂತ ವಿಜೃಂಭಣೆಯಿಂದ ನೆರವೇರಿದವು.
ಬರಹ: ತಂಡ, vishwachetana.com
