ನಗರ: ಇಂದಿನ ಯುವ ಪೀಳಿಗೆ ಕೃಷಿಯಿಂದ ವಿಮುಖರಾಗುತ್ತಿರುವ ಕಾಲಘಟ್ಟದಲ್ಲಿ, ಬಿದನೂರಿನ ಯುವಕ ಸಾಮ್ರಾಜ್ಯ ಶೆಟ್ಟಿ ಅವರು ಪಾರಂಪರಿಕ ಕೃಷಿಯನ್ನು ಅಳವಡಿಸಿಕೊಳ್ಳುವ ಮೂಲಕ ಮಾದರಿಯಾಗಿದ್ದಾರೆ. ಬೈಸೆ ಗ್ರಾಮದ ಶ್ರೀಧರಪುರದ 26 ವರ್ಷದ ಸಾಮ್ರಾಜ್ಯ, ತಮ್ಮ ಪೂರ್ವಜರ ಆಲೆಮನೆ ಪದ್ಧತಿಯನ್ನು ಮುಂದುವರಿಸುವ ಮೂಲಕ ಪ್ರಸಿದ್ಧ ‘ದೇವಗಂಗೆ ಬೆಲ್ಲ’ದ ಉತ್ಪಾದನೆಯಲ್ಲಿ ತೊಡಗಿದ್ದಾರೆ.
ಅಡಿಕೆ ಮತ್ತು ಶುಂಠಿ ಕೃಷಿಯೊಂದಿಗೆ ಸಕ್ರಿಯವಾಗಿರುವ ಸಾಮ್ರಾಜ್ಯ ಶೆಟ್ಟಿ, ಅಡಿಕೆ ತೋಟದಲ್ಲಿ ಕಳೆ ಯಂತ್ರ ಸೇವೆಯನ್ನೂ ತಂಡದ ಮೂಲಕ ಒದಗಿಸುತ್ತಿದ್ದಾರೆ. ಪ್ರಮುಖವಾಗಿ, ಅಜ್ಜಂದಿರ ಕಾಲದಿಂದಲೂ ನಡೆದುಬಂದಿರುವ ಕಬ್ಬು ಬೆಳೆ ಮತ್ತು ಆಲೆಮನೆಯನ್ನು ಲಾಭ-ನಷ್ಟದ ಆಲೋಚನೆಗಿಂತ ಹೆಚ್ಚಾಗಿ ಕುಟುಂಬದ ಪರಂಪರೆಯ ಸಂಕೇತವಾಗಿ ಮುಂದುವರಿಸುತ್ತಿರುವುದು ವಿಶೇಷ.
ಪರಂಪರೆ ಉಳಿವಿಗೆ ಪಣ
“ನಮ್ಮ ಕೈಯಿಂದ ಬೆಳೆದ ಕಬ್ಬು, ನಮ್ಮ ಆಲೆಮನೆಯಲ್ಲಿ ಮೂಡುವ ದೇವಗಂಗೆ ಬೆಲ್ಲ – ಇದೇ ನಮ್ಮ ಕುಟುಂಬದ ಗೌರವ. ಲಾಭಕ್ಕಾಗಿ ಅಲ್ಲ, ಪರಂಪರೆಯನ್ನು ಉಳಿಸಲು ನಾನು ಕೃಷಿ ಮಾಡುತ್ತಿದ್ದೇನೆ,” ಎಂದು ಯುವ ರೈತ ಸಾಮ್ರಾಜ್ಯ ಶೆಟ್ಟಿ ತಮ್ಮ ಆಶಯ ವ್ಯಕ್ತಪಡಿಸುತ್ತಾರೆ. ತಂದೆ ಕುಶಾಲ್ ಶೆಟ್ಟಿ ಅವರ ಮಾರ್ಗದರ್ಶನದಲ್ಲಿ ಈ ಸಾಹಸವನ್ನು ಅವರು ಮುಂದುವರಿಸಿದ್ದಾರೆ.
ವೈಶಿಷ್ಟ್ಯಪೂರ್ಣ ದೇವಗಂಗೆ ಬೆಲ್ಲ
ನೈಸರ್ಗಿಕ ವಿಧಾನದಲ್ಲಿ ತಯಾರಾಗುವ ದೇವಗಂಗೆ ಬೆಲ್ಲ ತನ್ನ ವಿಶಿಷ್ಟ ರುಚಿ ಮತ್ತು ಗುಣಮಟ್ಟಕ್ಕೆ ಹೆಸರುವಾಸಿ. ಈ ವರ್ಷ ಮಳೆ ಅಥವಾ ಹವಾಮಾನದ ಕಾರಣದಿಂದ ಇಳುವರಿ ಕಡಿಮೆಯಾಗಿದ್ದು, 16 ಕ್ಯಾನ್ ಬದಲು 8 ಕ್ಯಾನ್ ಬೆಲ್ಲ ಮಾತ್ರ ಲಭ್ಯವಾಗಿದೆ. ಆದರೂ, ಧೃತಿಗೆಡದ ಸಾಮ್ರಾಜ್ಯ ಮುಂದಿನ ಬಾರಿ ಹೆಚ್ಚಿನ ಶ್ರದ್ಧೆಯಿಂದ ಕಬ್ಬು ನೆಡುವ ಸಂಕಲ್ಪ ತೊಟ್ಟಿದ್ದಾರೆ.
ಆಲೆಮನೆ: ಸಂಭ್ರಮದ ಸಮ್ಮಿಲನ
ಆಲೆಮನೆ ನಡೆಸುವ ಸಮಯವು ಈ ಭಾಗದಲ್ಲಿ ಒಂದು ಹಬ್ಬದಂತೆ. ಸ್ನೇಹಿತರು ಮತ್ತು ಬಂಧುಗಳು ಬಂದು ತಾಜಾ ಕಬ್ಬಿನ ಹಾಲು ಮತ್ತು ಬೆಲ್ಲವನ್ನು ಸವಿಯುವ ದೃಶ್ಯ ಸಾಮಾನ್ಯ. ಈ ಭಾಗದ ಹಾಲಪ್ಪ ಗೌಡ್ರು, ಉದಯ ಶೆಟ್ಟಿ ಸೇರಿದಂತೆ ಹಲವು ಸಹಾಯಕರ ಸಹಕಾರದೊಂದಿಗೆ ಈ ಪ್ರಕ್ರಿಯೆ ಯಶಸ್ವಿಯಾಗಿ ನಡೆಯುತ್ತಿದೆ. ಸಾಮ್ರಾಜ್ಯ ಶೆಟ್ಟಿಯವರ ಈ ಪ್ರಯತ್ನ ಕೃಷಿ ಕ್ಷೇತ್ರದಲ್ಲಿ ಹೊಸ ಭರವಸೆ ಮೂಡಿಸಿದೆ.
ಬರಹ: ತಂಡ, vishwachetana.com
