ಸಿಎಂ ಸಿದ್ದರಾಮಯ್ಯ ಅಂಗಳಕ್ಕೆ ಮಲೆನಾಡಿಗರ ಕೂಗು!
ಹೊಸನಗರ/ಚಿಕ್ಕಮಗಳೂರು:
ಒಂದು ಕಾಲದಲ್ಲಿ ಮಲೆನಾಡಿನ ರಾಜಕೀಯ ಕೇಂದ್ರಬಿಂದುವಾಗಿದ್ದ ಹೊಸನಗರ ವಿಧಾನಸಭಾ ಕ್ಷೇತ್ರ, 2008ರ ಕ್ಷೇತ್ರ ಮರು ವಿಂಗಡಣೆಯ ಬಲಿಗೆ ಬಿದ್ದು ಇಂದಿಗೆ 18 ವರ್ಷಗಳಾಗುತ್ತಾ ಬಂದಿದೆ. ಅಂದಿನಿಂದ ಇಂದಿನವರೆಗೆ ಅಭಿವೃದ್ಧಿಯ ಹಾದಿಯಲ್ಲಿ ‘ಅನಾಥ’ಪ್ರಜ್ಞೆ ಅನುಭವಿಸುತ್ತಿರುವ ಹೊಸನಗರ ತಾಲೂಕನ್ನು ಮತ್ತೆ ಪ್ರತ್ಯೇಕ ಕ್ಷೇತ್ರವನ್ನಾಗಿ ಮಾಡಲೇಬೇಕು ಎಂಬ ಹೋರಾಟ ಈಗ ತಾರಕಕ್ಕೇರಿದೆ.
ಸಿಎಂಗೆ ಮನವಿ ಸಲ್ಲಿಸಿದ ಸುಹಾನ್ ಅಲಿ
ಚಿಕ್ಕಮಗಳೂರಿಗೆ ಭೇಟಿ ನೀಡಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿ ಮಾಡಿದ ಸುಹಾನ್ ಅಲಿ ಅವರು, ಹೊಸನಗರದ ಜನರ ದಶಕಗಳ ಬೇಡಿಕೆಯ ಮನವಿ ಪತ್ರವನ್ನು ಹಸ್ತಾಂತರಿಸಿದರು. ಮಲೆನಾಡಿನ ಈ ಆಯಕಟ್ಟಿನ ಭಾಗಕ್ಕೆ ಆಗುತ್ತಿರುವ ಅನ್ಯಾಯವನ್ನು ಸಿಎಂ ಗಮನಕ್ಕೆ ತಂದ ಸುಹಾನ್ ಅಲಿ, ಕೂಡಲೇ ಸಂಬಂಧಪಟ್ಟ ಸಮಿತಿಗೆ ಶಿಫಾರಸು ಮಾಡುವಂತೆ ಆಗ್ರಹಿಸಿದರು.
ಹೊಸನಗರ ಕ್ಷೇತ್ರ ಮರುಸ್ಥಾಪನೆ ಯಾಕೆ ಅಗತ್ಯ?
1– 2008ರಲ್ಲಿ ಕ್ಷೇತ್ರ ರದ್ದಾದ ನಂತರ ತಾಲೂಕಿನ ಅಭಿವೃದ್ಧಿ ಕುಂಠಿತಗೊಂಡಿದೆ. ಸಾಗರ ಮತ್ತು ತೀರ್ಥಹಳ್ಳಿ ಕ್ಷೇತ್ರಗಳ ನಡುವೆ ಹಂಚಿಹೋಗಿರುವ ಹೊಸನಗರಕ್ಕೆ ಸಿಗಬೇಕಾದ ವಿಶೇಷ ಅನುದಾನಗಳು ಮತ್ತು ಗಮನ ಸಿಗುತ್ತಿಲ್ಲ.
2– ಸುಮಾರು 175 ಕಿ.ಮೀ ಭೌಗೋಳಿಕ ವ್ಯಾಪ್ತಿ ಹೊಂದಿರುವ ಹೊಸನಗರ ತಾಲೂಕು, ರಾಜ್ಯದ ಹಲವು ವಿಧಾನಸಭಾ ಕ್ಷೇತ್ರಗಳಿಗಿಂತ ದೊಡ್ಡದಾಗಿದೆ.
3– ಇಲ್ಲಿ 1 ಲಕ್ಷಕ್ಕೂ ಅಧಿಕ ಮತದಾರರಿದ್ದಾರೆ. ಇಷ್ಟು ದೊಡ್ಡ ಸಂಖ್ಯೆಯ ಜನರಿಗೆ ತಮ್ಮದೇ ಆದ ಒಬ್ಬ ಶಾಸಕರಿಲ್ಲದಿರುವುದು ದೊಡ್ಡ ಕೊರತೆಯಾಗಿದೆ.
ಈ ಹೋರಾಟಕ್ಕೆ ಇತ್ತೀಚೆಗೆ ಹಿರಿಯ ರಾಜಕಾರಣಿ ಬಿ. ಸ್ವಾಮಿರಾವ್ ಅವರು ನಡೆಸಿದ 45 ಕಿ.ಮೀ ಪಾದಯಾತ್ರೆ ಹೊಸ ಚೈತನ್ಯ ನೀಡಿದೆ. ಸಾರ್ವಜನಿಕರು ಮತ್ತು ವಿವಿಧ ಸಂಘಟನೆಗಳು ಪಕ್ಷಾತೀತವಾಗಿ ಈ ಹೋರಾಟಕ್ಕೆ ಕೈಜೋಡಿಸಿವೆ. ಈಗಾಗಲೇ ಪ್ರಧಾನ ಮಂತ್ರಿಗಳು, ಸಂಸದರು ಹಾಗೂ ಜಿಲ್ಲಾಧಿಕಾರಿಗಳಿಗೂ ಮನವಿ ಸಲ್ಲಿಸುವ ಮೂಲಕ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಮೇಲೆ ಒತ್ತಡ ಹೇರಲಾಗುತ್ತಿದೆ.
ವಿಧಾನಸಭಾ ಕ್ಷೇತ್ರಗಳ ಮರು ವಿಂಗಡಣೆಯು ತಾಂತ್ರಿಕವಾಗಿ ಸಂಕೀರ್ಣ ಪ್ರಕ್ರಿಯೆಯಾದರೂ, ರಾಜ್ಯ ಸರ್ಕಾರವು ವಿಶೇಷ ಆಸಕ್ತಿ ವಹಿಸಿ ಕೇಂದ್ರದ ಡಿಲಿಮಿಟೇಶನ್ ಕಮಿಷನ್ಗೆ ಶಿಫಾರಸು ಮಾಡಿದರೆ ಹೊಸನಗರದ ಕನಸು ನನಸಾಗಬಹುದು. ಮಲೆನಾಡಿನ ಜನರ ಈ ನ್ಯಾಯಯುತ ಹೋರಾಟಕ್ಕೆ ಸರ್ಕಾರ ಹೇಗೆ ಸ್ಪಂದಿಸುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.
ಹೊಸನಗರದ ಅಸ್ತಿತ್ವಕ್ಕಾಗಿ ಹೋರಾಟ
2008ರಲ್ಲಿ ಹೊಸನಗರ ವಿಧಾನಸಭಾ ಕ್ಷೇತ್ರ ರದ್ದಾದಾಗಿನಿಂದ ತಾಲೂಕಿನ ಅಭಿವೃದ್ಧಿ ಕುಂಠಿತಗೊಂಡಿರುವುದು ವಿಷಾದನೀಯ. 1 ಲಕ್ಷಕ್ಕೂ ಅಧಿಕ ಮತದಾರರಿದ್ದರೂ ಪ್ರತ್ಯೇಕ ಕ್ಷೇತ್ರವಿಲ್ಲದಿರುವುದು ಅನ್ಯಾಯ. ಈ ಹಿನ್ನೆಲೆಯಲ್ಲಿ ಸುಹಾನ್ ಅಲಿ ಅವರು ಮುಖ್ಯಮಂತ್ರಿಗಳಿಗೆ ಸಲ್ಲಿಸಿರುವ ಮನವಿ ಅತ್ಯಂತ ನ್ಯಾಯಯುತವಾಗಿದೆ. ಸರ್ಕಾರ ತಕ್ಷಣ ಈ ಬಗ್ಗೆ ಗಮನಹರಿಸಿ, ಕ್ಷೇತ್ರ ಮರುಸ್ಥಾಪನೆಗೆ ಶಿಫಾರಸು ಮಾಡುವ ಮೂಲಕ ಮಲೆನಾಡಿಗರ ದಶಕಗಳ ಬೇಡಿಕೆಯನ್ನು ಈಡೇರಿಸಬೇಕು.- ಸಂಪಾದಕರು, ವಿಶ್ವಚೇತನ.ಕಾಂ
ಬರಹ: Chetandas Hosamane
